Sulmuesi i kombëtares Sokol Cikalleshi ka theksuar se pengu i këtyre kualifikueseve është ndeshja ndaj Polonisë të cilën kuqezinjtë e humbën me shifrat 1-0. Më pas bomberi i kombëtares u ndal edhe tek ndeshja me Anglinë.
“Pengu? Të gjithë jemi të pezmatuar nga Polonia, jo për atë që ndodh në fushë, por atë që ndodhi para, me COVID-in, dëmtimin e Gjimshitit, e patëm disa mungesa. Jo se do të fitonim patjetër, por do të ishim një grup i plotë dhe do të shihnim se ku do të ishim përballë Polonisë. Pengu i vetëm është ajo ndeshje, për mua, ekipin e stafin. Ky është futbolli e duhet pranuar çdo rezultat, të punojmë sa më shumë e të bëjmë hapa pozitive.
Në ndeshjen me Anglinë në momentin që filluam ndeshjen e pësuam golin e parë me goditje standarde, që e kemi folur gjatë me ekipin që vetëm me goditje standarde nuk duhet të pësojmë se është munges përqendrimi më shumë. Në momentin që pësuam golin aq shpejt, përsëri besuam. Besoj se nga ai presing i tepruar kishim rast me Uzunin, nuk erdhi nga koincidenca por nga presingu. Nuk them se do të ishte histori tjetër, por nuk do ishte ai rezultat në pjesën e parë të paktën. Golat na erdhën shpejt dhe ne e dinim që duhej rezultat pozitiv për vendin e dytë”, theksoi Sokol Cikalleshi.
Discussion about this post