Sulmuesi i Shqipërisë, Sokol Cikalleshi ka theksuar pas humbjes me Anglinë se kuqezinjtë u demoralizuan pas pësimit të golit të parë teksa nxorri në pah edhe kualitetet e kombëtares angleze.
“Një ndeshje që duhet të bënim më mirë. U munduam të luanim futboll ofensiv dhe t’i bënim presing lart Anglisë. Më vjen shumë keq që pësojmë gola me goditje standarte.
Besoj që është më shumë mungesë përqendrimi. Më vjen keq për tifozët e shumtë që ishin në stadium dhe ata që na ndoqën nga shtëpia. Të shohim përpara dhe të fitojmë ndeshjen me Andorrën. Sot vendosi kualiteti i Anglisë.
Me ekipe të tilla duhet të shënosh edhe kur ke gjysmë rasti. Për fat të keq Uzuni nuk shënoi dot. Ishin edhe goditjet e mia, por nuk duhet të flasim në aspektin individual, ne bëjmë diferencën kur luajmë në grup.
Goli i parë na shokoi, më pas ishte e vështirë të përballonim Anglinë në fushë të hapur”, deklaroi sulmuesi.
Discussion about this post