Deputetja e Partisë Demokratike, Jorida Tabaku, ka reaguar lidhur me rritje e çmimeve në vend. Ajo thekson se pasojat e këtij fenomeni janë modeli ekonomik i deformuar dhe politika fiskale e gabuar.
Sipas Tabakut, situata aktuale nuk është rastësore, por rezultat i drejtpërdrejtë i mënyrës se si funksionon ekonomia.
“Ekonomia sot nuk prodhon më. Ajo mbahet në këmbë nga administrata publike dhe nga ndërtimi. Praktikisht nuk kemi më ekonomi tregu, por një ekonomi të komanduar”, shprehet ajo në “Facebook”.
Deputetja thekson se ekonomia shqiptare është kthyer në një “ekonomi të pakicës”, ku përfitimet përqendrohen në një grup të kufizuar, në dëm të konkurrencës dhe prodhimit real.
Një tjetër element që Tabaku veçon është pesha e taksave në rritjen e çmimeve.
“Rritja e përgjithshme e çmimeve reflekton taksat e larta dhe një sistem fiskal që favorizon pakicën në dëm të shumicës”, deklaron demokratja.
Ajo shton se një pjesë e konsiderueshme e çmimit të karburantit përbëhet nga taksat, duke ndikuar drejtpërdrejt në koston e jetesës për qytetarët.
Në përfundim, Tabaku argumenton se modeli aktual ekonomik po frenon zhvillimin dhe po përkeqëson gjendjen ekonomike të familjeve shqiptare.
Discussion about this post