FIFA ka gjetur një tjetër mënyrë për të përfituar financiarisht nga Kupa e Botës 2026, duke nxjerrë në shitje copa të barit nga fusha ku do të zhvillohet finalja e turneut.
Fragmentet e barit të stadiumit “MetLife” në New Jersey, ku do të luhet finalja më 19 korrik, shiten me çmimin 450 dollarë dhe prezantohen nga FIFA si një suvenir ekskluziv për koleksionistët dhe tifozët e futbollit.
“Bëhuni pronar i një pjese autentike të historisë së futbollit me një copë origjinale të fushës së finales së Kupës së Botës 2026, e ruajtur përgjithmonë në një kapsulë premium prej akriliku me një USB suvenir”, thuhet në përshkrimin e produktit në dyqanin zyrtar të FIFA-s.
Sipas organizatës, çdo paketë përmban një fragment origjinal të fushës së finales, një certifikatë autenticiteti dhe një kuti të posaçme për ekspozim.
Megjithatë, FIFA nuk ka bërë të ditura përmasat e sakta të copave të barit. Gjithashtu, është njoftuar se porositë do të dërgohen vetëm pas përfundimit të finales dhe vetëm në adresat brenda Shteteve të Bashkuara dhe Evropës.
Kjo nuk është hera e parë që FIFA shet pjesë të fushave ku zhvillohen ndeshje madhore. Edhe pas finales së Kupës së Botës për Klube, ku Chelsea mposhti Paris Saint-Germain, organizata nxori në shitje copa të barit të stadiumit MetLife.
Ndërkohë, fusha e këtij stadiumi ka qenë në qendër të kritikave gjatë turneut, pasi impianti përdoret zakonisht me sipërfaqe artificiale për ndeshjet e NFL-së.
Disa lojtarë dhe trajnerë kanë shprehur pakënaqësi për cilësinë e barit të vendosur posaçërisht për Botërorin.
Përveç suvenireve të veçanta, FIFA është përballur edhe me kritika për çmimet e larta të biletave të finales, të cilat në disa kategori arrijnë deri në dhjetëra mijëra dollarë.
Discussion about this post