Çmimi i naftës në bursë ka shënuar nivelin më të ulët këtë të enjte që nga konflikti i armatosur në Ukrainë, duke sjellë një dritë jeshile për të gjithë ekonominë globale. Kontratat e së ardhmes së naftës së papërpunuar Brent u ulën me 2,66 dollarë, ose 2,75%, në 94,12 dollarë, mbyllja më e ulët që nga 18 shkurti.
Por pavarësisht këtij fakti, Bordi i Transparencës nuk ka asnjë reagim. Qytetarët vijojnë ende ta blejnë naftën 221 lekë për litër, gjë që duket absurde kur në gjithë botën, çmimi i “arit të zi” ka pësuar rënie.
E njëjta situatë, paraqitet me produktet e shportës veçanërisht grurit dhe nënprodukteve të tij, për të cilat Bordi i Transparencës duhej të reagonte duke ulur çmimin pas normalizimit të eksportit të grurit nga Ukraina. Lëvizje kjo që solli uljen e çmimit të grurit me të paktën 2% në nivelet botërore.
Rënia e çmimeve të naftës mund të vijë si një lehtësim për vendet e mëdha konsumatore, përfshirë Shtetet e Bashkuara dhe vendet në Evropë, të cilat u kanë kërkuar prodhuesve të rrisin prodhimin për të kompensuar furnizimet e ngushta dhe për të luftuar inflacionin e furishëm.
Nafta ishte rritur në mbi 120 dollarë për fuçi në fillim të vitit. Një rikthim i papritur i kërkesës nga ditët më të errëta të pandemisë COVID-19 përkoi me ndërprerjet e furnizimit që rrjedhin nga sanksionet ndaj prodhuesit kryesor Rusisë për pushtimin e saj në Ukrainë.
Shitja e së enjtes pasoi një rritje të papritur të stoqeve të naftës së papërpunuar në SHBA javën e kaluar. Stoqet e benzinës, treguesi i kërkesës, treguan gjithashtu një rritje të papritur pasi kërkesa u ngadalësua nën peshën e çmimeve të benzinës afër 5 dollarë për gallon, tha Administrata e Informacionit të Energjisë.
Discussion about this post