Kingsley Coman është kthyer në një veteran të mirëfilltë të Bayern, me të cilët ka korrur shumë suksese në Bundesliga.
Ai e vesh fanellën e Bayernit për herë të parë në vitin 2015, me formulë huazimi nga Juventusi, por në verën e vitit 2017 rekordmenët gjermanë u bindën plotësisht për të depozituar 21 milionë euro në arkat e “zonjës së vjetër”.
27-vjeçari e mbylli sezonin e 8-të me ekipin nga Mynihu, duke korrur një tjetër sukses në planin individual, trofeun e 10-të radhazi në liga të ndryshme, e përkthyer me 8 Bundesliga, 1 Serie A dhe 1 Ligue 1 me PSG-në.
“Mbreti” (pseudonimi i Komanit, referuar emrit Kingsley) është “rrëfyer” në kanalin zyrtar të ekipit ku aktivizohet, duke u ndalur në tema të ndryshme.
BESNIKËRIA – “Kam 8 vjet që gjendem në këtë ambient të mrekullueshëm në Mynih. Nuk hezitova kur mu propozua kontrata e fundit nga bordi.
Dëshira ime korrespondon në kthimin e një legjende te Bayerni, ndonëse nuk mund ta zëvendësoj dot personifikimin e Muellerit. Dua të jem i paarritshëm në kategorinë e lojtarëve të huaj.
Nuk do ta harroj kurrë bisedën me Riberyn, ai më dha motiv që të vija në ‘Allianz Arena’. Vlerat që më prezantoi dhe fryma mbizotëruese më bindën”, shtoi Coman.
LARGIMET – “Mundohem t’i kuptoj se disa nga grupi ynë ngulmojnë për të ndërruar ekip, pasi kërkojnë motivim të ri. Ama shumë lojtarë harrojnë se komponenti kryesor në kthimin e të qëndruarit protagonist, vjen prej skuadrës së konsoliduar dhe bavarezët e kanë dëshmuar se çfarë janë në gjendje të kryejnë, madje edhe në momente të vështira”.
MOTIVIMI – “Pas përfundimit të karrierës si profesionist, dua që emri im të jetë i gdhendur në çdo sezon që kam shkelur si triumfues në kampionatet, pra të vazhdoj dominimin individual dhe atë ekipor me Bayernin edhe ne vazhdimësi, një ndër motivimet kryesore që më shtynë drejt limiteve”, përfundoi sulmuesi anësor.
Discussion about this post