Roma barazoi 2-2 ndaj Bodo/Glimt mbrëmjen e së enjtes dhe tifozët e ‘Verdhekuq’ duket se po humbasin durimin me Jose Mourinhon, teksa fishkëllenin ekipin dhe trajnerin në fund të ndeshjes.
‘Special One’ po kalon një kohë të vështirë në ‘Stadio Olimpico’, pasi ai mori vetëm një pikë nga dy ndeshje kundër skuadrës norvegjeze dhe tashmë ka humbur katër ndeshje në Serie A këtë sezon.
Mourinho pranoi se lojtarët e tij bënë gabime në takimin e djeshëm të Conference League kundër Bodo/Glimt, por e justifikoi barazimin 2-2 me gabimet e arbitrave.
Megjithatë, tifozët e Romës nuk u impresionuan nga performanca dhe rezultati dhe për herë të parë këtë sezon, ata ofenduan ekipin dhe trajnerin.
‘La Gazzetta dello Sport’ dhe ‘Il Corriere dello Sport’ theksojnë se si mbështetësit e Romës po humbasin durimin me portugezin.
Roma duket se ka të njëjtat probleme si sezonin e kaluar, kur i mungonte qëndrueshmëria, duke e mbyllur sezonin në vendin e shtatë.
‘Verdhekuqtë’ tani janë në pikë të barabarta me Atalantën në vendin e katërt, 12 pikë prapa liderëve Milan dhe Napoli. Ata do të udhëtojnë drejt Venezias të dielën, para pushimit ndërkombëtar./K.T/Gijotina.com
Discussion about this post