Brazili ka arritur të marrë fitoren e parë në Cop America, pas barazimit zhgënjyes në ndeshjen e parë 0-0 përballë Kosta Rikës.
”Selecao” kanë arritur të mposhtin bindshlm me rezultatin 4-1 Paraguain, në ndeshjen e vlefshme për grupin D, të luajtur në stadiumin Allegiant në Las Vegas, Shtetet e Bashkuara të Amerikës. Ai që shkëlqeu më shumë ishte sulmuesi i Real Madrid, Vinicius Junior, duke lënë pas kritikat e ndeshjes së parë.
Brazili e filloi mirë takimin dhe ishte më këmbëngulëse në fazën sulmuese, me rastin e parë serioz që ishte penalltia e minutës së 31-të, kur Lucas Paqueta gaboi nga pika e bardhë.
Vetëm katër minuta më vonë, pas një aksioni të shkëlqyer, Paqueta asistoi për Vinicius, i cili bëri veprime fantastike, për të shënuar golin e parë të ndeshjes.
Dy minuta para fundit të pjesës së parë, Savinho, dyfishoi rezultatin, duke shënuar në portën boshe. Në minutat shtesë të fraksionit të parë të lojës, Vinicius Junior, shënoi golin e dytë personal, për rezultatin 3:0, kur mbrojtësi i Paraguait bëri gabim katastrofal.
3:0 u mbyll pjesa e parë e takimit, ndërsa në 45 minutat në vazhdim u shënuan dy gola, me secilën kombëtare nga një.
Fillimisht ishte Paraguai që me anë të Alderete ngushtuan rezultatin në 3:1 në minutën e 48-të. Ndërsa për rezultatin përfundimtar 4:1 shënoi Lucas Paqueta, në minutën e 65-të, kur kësaj radhe u tregua i saktë nga penalltia.
Deri në fund nuk pati ndryshim në rezultat dhe Brazili iu gëzua fitores së thellë, që i çon ata në vendin e dytë në grupin D me 4 pikë në 2 ndeshje të zhvilluara.
Në ndeshjen tjetër, Kolumbia arriti të fitonte me rezultatin e pastër 3-0 përballë Kosta Rikës.
Kolumbianët arritën të gjenin golin që në fraksionin e parë të lojës, me anë të Luiz Diaz në minutën e ’31 të takimit. Në pjesën e dytë do të shënonin dhe dy herë të tjera me Davinson Sanchez Jhon Cordoba.
Pas kësaj fitore, Kolumbia siguron kualifikimin, e cila ndodhet në vendin e parë në grup me 6 pikë pas 2 ndeshjes.
Në përballjen e fundit të grupit do të kemi dualin mes Kolumbisë dhe Brazilit, që do të jetë vendimtare për kalimin e grupeve për “Selecaon”, pasi kolumbianët tashmë e kanë siguruar çerekfinalen.
Brazilit do t’i nevojitet vetëm një pikë për të siguruar kalimin në fazën me eliminim direkt, teksa me fitore do ta siguronte vendin e parë në grup.
Discussion about this post