Coppa Italia, gjysmëfinalet sjellin pezullime dhe gjoba

Tribuna Jugore e Stadiumit, e mbyllur për një turn (do të jetë më 23 prill kundër Napolit).

Juventus paguan ‘buu-të’ raciste të disa tifozëve ndaj Lukakut gjatë fundit shumë të nxehtë të ndeshjes së parë gjysmëfinale të Kupës së Italisë mes “bardhezinjve” dhe Interit.

Ky është vendimi më i pritur i gjyqtarit sportiv pas kaosit të nisur në përfundim të atij takimi. Për sherrin mes lojtarëve, Cuadrado e vuan mbi të gjithë, tre ndeshje skualifikim për kolumbianin (kacafytje, shtyrje dhe një grusht ndaj Handanoviç).

Një ndeshje dënim edhe për “nerazzurrët” Handanoviç (konflikt fizik me Cuadradon) dhe Lukaku.

“PLASIN GJOBAT”

Me nga 10 mijë euro gjobë u sanksionuan si Cuadrado ashtu dhe Handanoviç. Dënimi për Juventusin (hedhja e sendeve në fushë) është pak më i ulët, 4 mijë euro.

Në fund, një gjobë prej njëzet mijë eurosh për menaxherin e Interit, Baccin, i cili dyshohet se ka tentuar të arrijë te arbitri pas fundit të ndeshjes, duke e ofenduar vazhdimisht.

Ato te Juve-Inter ishin vendime që ishin të parashikueshme, përsa i përket Cremonese-Fiorentina bien në sy gjobat e vendosura nga gjyqtari sportiv Alessandro Zampone: 12 mijë euro toskanëve për hedhjen e mjeteve tymuese, 6 mijë për “Grigiorossët” po për të njëjtën vepër (hedhjen e mjeteve tymuese).