Variantit i ri koronavirusit ka mbërthyer Kosovën. Sipas të dhënave të publikuara nga Ministria e Shëndetësisë atje, në vetëm 12 ditët e para të shtatorit kanë humbur jetën si pasojë e koronavirusit 269 persona, një rekord negativ ky krahasuar me të njëjtën periudhë të çdo muaji që prej kohës kur u shfaq pandemia në këtë vend.
Gjithashtu, Kosova regjistrohet në mesin e shteteve që kanë vdekshmërinë më të lartë nga Covid-19 në raport me numrin e popullsisë. Konkretisht, 12 ditëshi i parë i shtatorit ka patur më shumë fatalitete po ta krahasojmë edhe me gjithë muajin gusht të 2021, ku u shënuan 234 humbje jete. Situata duket edhe më rëndë, nëse e krahasojmë me Shtatorin e vitit të shkuar, ku gjatë gjithë 30 ditëve u shënuan vetëm 100 viktima nga koronavirusi.
Nga të dhënat e publikuara, evidentohet se, që prej nisjes së pandemisë në Kosovë e kanë humbur jetën 2772 persona, më i riu prej tyre një foshnje vetëm 3- javëshe, e cila u nda nga jeta javën e shkuar.
Situata paraqitet shumën e rëndë edhe në spitale, ku numri i të shtruarve vijon të mbetet shumë i lartë. Autoritetet shëndetësore atje kanë konfirmuar se aktualisht janë 1043 pacientë të shtruar në spitalet Covid-19, nga këta 862 janë në gjendje të oksigjenuar.
