Ministri i Brendshëm, Bledi Çuçi pas takimit me homologun e tij austriak Karl Nehammer, kanë dalë në një deklaratë për mediat pas vrasjes së policit Saimir Hoxha ditën e djeshme në Lezhë.
Ministri Çuçi tha se Hoxha do të përcillet si dëshmor atdheu, ndërsa tha se shumë shpejt policia do të dalë më një njoftim të plotë për ngjarjen.
‘’SHÇBA bën punën e saj para ligjit, mos u merrni me këtë çështje, sot do të përcjellim Dëshmorin e Atdheut. E keni gabim, statistika ka, botohen çdo muaj. Kemi statistikat që publikohen periodikisht bashkë me partnerët tanë. Lufta kundër fenomenit të kultivimit të kanabisit ka shënuar majën, e tregojnë shumë këtë”.
Duke injoruar raportet ndërkombëtare dhe vdekjen e efektivit në krye të detyrës, ministri tha se ky do jetë një ndër vitet më të suksesshme të luftës ndaj trafikut të kanabisit.
“Së pari numri i tregtarëve e parcelave të asgjësuara, e dyta presioni që është ngritur dhe nga trafikantët në lidhje me mungesën në treg të këtij produkti narkotik, janë dhe të dhëna, asnjë gomone e kapur në Itali, sivjet, nga forcat italiane, vetëm ne e kemi kapur. Rritja e çmimit po ashtu. Ky fenomen është zvogëluar, dhe besoj do të jetë një ndër vitet më të suksesshëm të luftës ndaj trafikut e luftës kundër kanabisit,” tha Çuçi.
Ndër të tjera, ministri u pyet se përse policët kishin shkuar në atë zonë pa qenë të pajisur me anti-plumb, por zgjodhi të shmangej duke thënë se këto informacione policia i kishte bërë publike dhe se mund të merreshin në drejtori.
