Qysh kur Beldi Çuçi u vendos në krye të Ministrisë Brendshme, është thelluar degradimi i Policisë së Shtetit. Ndërsa pritet të zbulohen atentatet mafioze në rritje, vrajset, të mbrohen familjet nga dhuna, të ndëshkohen skandalet, bie qershia mbi tortë: Policia jepet me qira! Një vendim i marrë me 7 shtator nga Këshilli i Ministrave përcakton se, Policia e Shtetit mund të ofrojë shërbime me pagesë duke dhënë në përdorim uniformën zyrtare, armë me fishekë manovër, pajisje të tjera dhe ambiente, në fushën e kinematografisë, gjatë zhvillimit të xhirimeve filmike. Jo vetëm kaq, efektivët e Policisë së Shtetit mund të merren për shërbim privat nga persona juridik në festivale, panaire, koncerte, si dhe aktivitete të ndryshme ndërkombëtare. Nuk mjaftonte shqëria “Illyrian Guard”, e krijuar nga parardhësi i tij, Sandër Lleshi, por duhej edhe ky shteg për ta privatizuar Policinë e Shtetit.
Vendimi
“Policia e Shtetit ofron shërbime shtesë kundrejt pagesës për persona juridikë e fizikë, publikë ose privatë, në bazë të kërkesës së tyre, për: mbështetje në zhvillimin e aktiviteteve kulturore, kombëtare dhe ndërkombëtare, si: panaire, ekspozita, teatro, koncerte, shfaqje, festivale të ndryshme, në mjedise të hapura dhe të mbyllura publike, si dhe gjatë zhvillimit të aktiviteteve sportive kombëtare dhe ndërkombëtare, në rastet kur organizatorët e këtyre aktiviteteve nuk janë pajisur me vërtetim sigurie nga Policia e Shtetit, sipas përcaktimeve të ligjit nr.19/2016, “Për masat shtesë të sigurisë publike”, me sigurimin fizik privat, për të ruajtur sigurinë brenda perimetrit të zhvillimit të aktivitetit. Policia ofron gjithashtu, vënien në përdorim të uniformës së Policisë së Shtetit, armëve me fishekë manovre, pajisjeve të tjera, mjeteve të loguara policore dhe ambienteve, në fushën e kinematografisë, gjatë zhvillimit të xhirimeve filmike”,thuhet në vendimin e propozuar nga Ministria e Brendshme. Ndërsa theksohet se me hyrjen e këtij vendimi në fuqi, policia do të ruajë edhe investitorët strategjikë. Duke treguar qartë që policia po bashkëpunon me oligarkët që përpijnë fondet.
Policia në “shitje” on-line
Me pak fjalë përmes këtij vendimi Çuçi i ka nxjerrë policët në “shitje on-line”. Kështu, në vendimin e publikuar thuhet se, “subjektet juridike e fizike, publike ose private, që kanë nevojë për shërbime policie shtesë, paraqesin kërkesë të argumentuar on-line nëpërmjet portalit unik qeveritar “e-Albania”, jo më vonë se 3 ditë përpara datës së shërbimit të kërkuar. Pas vlerësimit të kërkesës, brenda 48 orëve, subjektit i kthehet përgjigje on-line nëpërmjet portalit unik qeveritar “e- Albania” për miratimin ose refuzimin e kërkesës dhe i dërgohet kontrata e ofrimit të shërbimit”.
Por në këtë vendim në asnjë moment nuk thuhet se çfarë përfitimesh do të kenë punonjësit e policisë në këto raste, pasi më sipër theksohet se të ardhurat që fitohen do të derdhen një pjesë në buxhetin e shtetit dhe një pjesë në fondin e Policisë së Shteti. A do të ketë rritje rroge për punonjësit që do të japin këto shërbime. Gjithashtu, në vendim nuk sqarohet se si do të organizohet ky proces, pasi sipas ligjit punonjësit e policisë gjatë orarit të punës janë të angazhuar në institucionin përgjegjës.
Nuk dihet pse këto vendime janë marrë fill pasi u shkarkua nga detyra ish-drejtori Gledis Nano dhe ende pa filluar punën zyrtarisht drejtori i ri. Por, në një logjikë normale çdokujt do t’i dukej absurde dhënia me “qira” e Policisë së Shteti për festa dhe filma. Këto janë funksione që mund t’i kryejnë shumë mirë kompanitë private të sigurisë fizike, pa llogaritur “Yllirian Guard” që varet po ashtu nga Çuçi./Esmeralda Hida/
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post