Ministri i Brendshëm, Bledi Çuçi, gjatë fjalës së tij në Konferencën Kombëtare për Korrupsionin është shprehur se digjitalizimi i shërbimeve ka ulur korrupsionin. Çuçi u shpreh se gjatë vitit që lamë pas në Komisariatin digjital kanë ardhur mbi 60 mijë raportime nga qytetarët, ku mes tyre ka patur qindra denoncime për korrupsion.
“Komisariati digjital, ky fakt përmendet edhe në raportin vjetor kundër korrupsionit dhe siç e thashë unë për këtë ndihem krenar. Përpjekjet dhe investimet tona në këtë drejtim kanë pasur rezultate të prekshme në këtë vend. Në 2021 në këtë platformë kanë ardhur 60 mijë raportime dhe në këto qindra denoncime. Rreth 527 kanë qenë vetëm për korrupsion dhe organet kanë marrë masat e nevojshme”, tha Çuçi.
Në fjalën e tij, ministri bëri me dije se sistemit të kamerave dhe radarëve do t’u shtohen programe të reja të cilat flirtojnë të dhënat në kohë reale dhe përcaktojnë masat sipas rasteve.
“2021 Policia e Shtetit ka kryer një seri me operacione. 17 të tilla që kanë të bëjnë me korrupsionin. Të ndaluar janë 58 persona dhe autor të dyshuar në korrupsion janë 92. Teknologjia ka qenë në themel të hetimeve në këto raste. Ky është vetëm fillimi i një revolucioni digjital i cili po shtrihet në formë kapilare në formë se si forcat e policisë operojnë. Sistemet e kamerave, radarëve dhe droneve do tu shtohen programe të reja që flirtojnë të dhënat e marra në kohë reale dhe përcaktojnë masat sipas rasteve. Policia e Shtetit vijon të kryesojë listën e institucioneve më të besueshme nga publiku shqiptar. E konfirmuar kjo edhe nga sondazhi i pavarur një vit më parë financuar nga Suedia”, shtoi ai.
Discussion about this post