Ministri i Brendshëm, Bledi Çuçi ka dërguar në Kuvendin e Shqipërisë një projektligj që në vetvete ka për synim shkrirjen e SHÇBA (Shërbimi për Çështjet e Brendshme dhe Ankesat) dhe krijimin e një agjencie shumë më të fuqishme, të cilën e ka quajtur Agjencia e Mbikëqyrjes Policore.
Në ndryshim nga SHÇBA-ja, Agjencia e re në varësi të ministrit të Brendshëm do të ketë më shumë kompetenca dhe detyra të reja. Projektligji i ri u prezantua në mbledhjen e Komisionit të Ligjeve. “Do jetë një Agjenci Inteligjente për të luftuar korrupsionin dhe për të parandaluar veprimtarinë e paligjshme në radhët e subjekteve të Agjencisë. Transformimin e Agjencisë drejt një modeli më demokratik dhe institucional. Sa i takon risive të projekt/ligjit, në radhë të parë është zgjeruar fusha e përgjegjësisë. Tashmë sot ajo që quhet SHÇBA dhe pas miratimit të ligjit do të quhet Agjenci në fushën e përgjegjësisë do të shtohen dhe subjekte të tjera si Garda e Republikës apo Shërbimi Zjarrfikës përveç Policisë së Shtetit që është deri më tani. Edhe ndryshimi i emrit ka kuptimin e vet”, tha ministri Çuçi në prezantimin e AMP-së.
Por çfarë nuk tha ministri Çuçi dhe pse atij i intereson krijimi i kësaj agjencie. Siç ndodh rëndom, por duke marrë shkas dhe nga hapësirat që të lejojnë ligjet në fuqi, me shkrirjen e SHÇBA dhe krijimin e një agjencie të re, ministrit i lind e drejta që të largojë “të padëshiruarit” me motivacion “shkurtim i vendit të punës dhe të emërojë “të bindurit” me kritere, të cilat i vendos me ligjin e ri. Nga ana tjetër, me këtë projektligj, ministri kontrollon dhe procesin e vettingut në polici.
Kjo ka ndodhur edhe më herët me ndryshimin e strukturave të ndryshme shtetërore dhe janë makinacione që përdoren për vendet e punës dhe për rritjen e influencës. Vetë SHÇBA si strukturë ka vetëm pak vite që mban këtë emër, pasi më herët ishte SHKB, e cila u shkri pikërisht për të ndryshuar njerëzit e padëshiruar, pasi në thelb mbeten të njëjtat detyra. Tashmë, veçse do ndryshohen punonjësit, kjo strukturë merr kompetenca edhe mbi strukturat e tjera, siç janë Zjarrfikësit dhe Garda e Republikës./ Gijotina.com
