Bledi Çuçi është zgjedhur Kryetar i Grupit Parlamentar të Partisë Socialiste. Vendimi është marrë në Asamblenë Kombëtare të PS-së. Ndërkohë Blendi Klosi është zgjedhur Sekretar i Përgjithshëm i PS-së, duke zëvendësuar Damian Gjiknurin në këtë pozicion.
Çuçi u shkarkua nga Kryeministri Edi Rama si ministër i Brendshëm, pas ngjarjes së ndodhur në Krujë, ku pjesëtarë të fisit Rraja dhunuan dy qytetarë për shkak të një konflikti të krijuar nga një gurore që administrohej nga Rrajat.
Ndërkohë dy javë pas shkarkimit si ministër, Rama ka preferuar t’I besojë Çuçit drejtimin e Grupit Parlamentar, pozicion që mbahej nga Taulant Balla, i emëruar ministër i Brendshëm.
Mediat më parë kishin njoftuar se grupi parlamentar mund të drejtohej nga Toni Gogu, një prej deputetëve që njihet si mbështetës dhe pjesë e grupimit të Erion Veliajt në Partinë Socialiste. Por duket se Rama ka bërë zgjedhjen e Çuçit, duke vijuar të ketë në krye të grupit parlamentar një nga njerëzit e besuar të tij.
Discussion about this post