Hapja e tenderëve nga institucionet publike shqiptare, në shumicën e rasteve kanë qenë me shifra të ekzagjeruara për punë të vogla, por nuk kanë munguar edhe procedurat e çuditshme për qëllimin që janë hapur. Një prej tyre është edhe ai i Institutit të Mjekësisë Ligjore, i cili ditën e djeshme ka hapur tender për marrje me qira të 3 fuoristradave me vit prodhimi 2022, për një vlerë që shkon gati deri në 100 milionë lekë.
Sipas vëzhgimeve të bëra në këtë tender, rezulton se punonjësit e Morgut të Tiranës dëshirojnë që ta ndërmarrin këtë hap. Nuk dihet se përse morgut i duhen tre fuoristrada prodhim i këtij viti për të bërë punën e tyre, pasi sigurisht nuk u nevojiten për të bërë xhiron e fundit për të ndjerët që kanë pasur fatin e keq që të përfundojnë aty. Për ti marrë morgu me qera këto fuoristrada, janë harxhuar nga buxheti i shtetit plot 100 milionë lekë.
Megjithatë, në mënyrë për ta konkretizuar më shumë çështjen bëhet fjalë për tenderin me numër reference REF-21372-03-07-2022 i organizuar nga Instituti i Mjekësisë Ligjore me objekt “Marrje me qira të 3 automjeteve” me fond limit 7,650,000 lekë të reja pa TVSH ose rreth 92 milionë lekë të vjetra me TVSH.
Tenderi në bazë të vëzhgimeve të bëra është tepër i dyshimtë nga mënyra se si ai është organizuar dhe ndërtuar. Në këtë rast vihet re se ka një mungesë konkurrence pasi ka fituar vetëm firma që garoi. Ndërsa, në rastin konkret bëhet fjalë për bashkimin e operatorëve AFA RENT A CAR SHPK, LIDER-AUTO FRANCE AL SHPK PARTNER të cilët kanë ofruar vlerën prej 7,599,960 lekësh të reja.
Së fundmi, kjo vlerë është vetëm 50 mijë lekë më e vogël se fondi limit i tenderit, pra në këtë rast kemi të bëjmë me një ofertë që kap vlerën mbi 99% të fondit limit. Një flamur ky që duhet valëvitur fort para “fytyrës” së SPAK.
Discussion about this post