Deputetja demokrate Dhurata Çupi ka reaguar pas vendimit për përjashtimin për 10 ditë të 8 deputetëve të PD-së me argumentin se bllokuan senacën e së enjtes duke zaptuar foltoren e Kuvendit.
Reagimi i deputetëve të opozitës erdhi pasi mazhoranca socialiste e Kryeministrit Edi Rama refuzoi të zëvendësonte anëtarët opozitarë në Komisionin për Reformën Zgjedhore, çka u konsiderua një shkelje kushtetuese.
Ndërkohë sot me propozim të Grupit Parlamentar socialist u mor vendimi për përjashtimin e 8 deputetëve, mes të cilëve edhe Gazment Bardhi, kryetar i Grupit Parlamentar demokrat.
Çupi e cilëson këtë vendim si një frikë që ka PS nga opozita e vërtetë.
“Vendimi i përjashtimit të disa deputetëve demokratë tregon se, pavarësisht fuqisë së madhe, PS ka frikë nga opozita e vërtetë.
PS po kthjellohet dita-ditës se ka marrë fund koha kur pushteti luante me PD-në.
Mund të bëjnë gjithfarë manovrash, por nuk na imponojnë dot përfaqësimin në komisionin e reformës zgjedhore dhe kudo.
Sot, ata përjashtojnë kreun e grupit parlamentar dhe disa kolegë të tjerë, sepse e kanë të qartë se këta janë opozitarë 24 karatësh.
Sado ta përjashtojnë Gazment Bardhin nga seanca e së enjtes, kur do të jetë debati për rezolutën e Kosovës, PS nuk fshin dot faktin se rezoluta e dorëzuar në Kuvend nga Kryetari i Grupit Parlamentar të PD njehsohet me atë të Kuvendit të Kosovës, ndërsa PS gjendet e turpëruar nga deklaratat e kryeministrit se Kosova e Veriut është kthyer në tokën e askujt.
Ne do të mbrojmë fort interesin kombëtar. Ne nuk e dorëzojmë opozitën!”, tha Çupi.
Discussion about this post