Arbër Çyrbja, ish-kapiteni i Teutës tashmë lojtar i Egnatias ka folur për përballjen me skuadrën që ka luajtur për shumë vite. Ai ka theksuar se synon fitoren ndaj ekipit që është rritur ndërsa u ndal edhe tek objektivat sezonalë.
“Është e vërtetë që në atë klub jam rritur. Kam shumë kujtime për të mirë dhe për keq me Teutën, ku kam mësuar shumë gjëra sezon pas sezoni. Për mua është ndjesi e mirë që do të luaj kundër ish-skuadrës sime, por dua ta fitoj këtë përballje me klubin ku bëj pjesë.
Të paraqitemi sa më mirë, por presidenti ka si objektiv pjesëmarrjen në Kupat e Europës. Ka kohë plot në vijim. Kampionati është i gjatë, do të shikojmë gjatë rrugës për të qenë sa më lart e ta rendisim Egnatian aty ku e meriton. Ne bëjmë llogaritë tona pas çdo ndeshjeje. Shpresoj që, veç formës së mirë, të kemi edhe fatin në anën tonë”, theksoi Çyrbja.
