U dënua për shpërdorim detyre, Vangjush Dako kërkon pafajësi në Gjykatën e Lartë

Ish-kryebashkiaku i Durrësit, Vangjush Dako, kërkon pafajësi në Gjykatën e Lartë.

Dako i ka bërë rekurs vendimit të Apelit të Posaçëm të shtatorit 2025, që la në fuqi dënimin me 2 vjet e 8 muaj burg ndaj tij, si fajtor për “shpërdorim të detyrës”.

Vendimit të Apelit i është bërë rekurs edhe nga të bashkëpandehurit e tij, Fiqiri Farruku, Fatmir Ejupi, Adrian Bulku të gjetur fajtorë për shpërdorim detyre rreth tenderave në bashki.

Sipas raportimeve, Gjykata e Lartë me dorëzimin e rekursit ka hedhur shortin ku dhe është caktuar si relator gjyqtari i lartë, Genti Shala.

Vangjush Dako u arrestua më 6 qershor 2023 dhe u lirua në shkurt 2024 pasi i përfundoi afati i paraburgimit. Më pas qëndroi në arrest shtëpie deri më 25 nëntor 2024, kur GJKKO e dënoi me 2 vite e 8 muaj burg për shpërdorim detyre në dy raste.

Rasti i parë lidhet me një pallat në Durrës, ndërtuar 12 vite më parë dhe shembur nga tërmeti i vitit 2019. Leja e ndërtimit për këtë objekt u miratua tre vjet pas përfundimit të tij, duke legalizuar 4 kate të ndërtuara pa leje, ndërkohë që ndërtimi nuk ishte kryer sipas projektit të miratuar.

Rasti i dytë lidhet me tenderin për ndërtimin e një shëtitoreje gjatë viteve 2014-2015, për të cilin Kontrolli i Lartë i Shtetit konstatoi një dëm prej 18 milionë lekësh për buxhetin e shtetit.

Përveç dënimit me burg, vendimi i Gjykatës së Posaçme i heq Dakos të drejtën për të ushtruar funksione publike për një periudhë 5-vjeçare.