Deputeti demokrat Dashnor Sula në studion e News24 tha se Sali Berisha, Lulzim Basha dhe Ilir Meta kanë një shans që deri në shtator të reflektojnë lidhur me situatën ku ndodhet opozita, pasi në të kundërt janë të pakorrigjueshëm dhe Edi Rama ta gëzojë pushtetin.
Sula tha se demokratët nuk kanë asnjë faj për përplasjen që u krijua mes Lulzim Bashës dhe Sali Berishës, ndërsa shtoi se PD mund të bashkohet vetëm me një ofertë të re dhe me fytyra të reja.
“Nëse Sali Berisha do të vijojë të mbajë nën kontroll atë pjesën e madhe dhe Lulzim Basha, bashkë me 4-5 të tjerë do të kenë nën kontroll atë pjesën e vogël, ky do të ishte një dështim.
Nëse nuk realizohet bashkimi real i demokratëve, atëherë po ua them që sot që ta harrojnë që në 2025 mundim Edi Ramën në zgjedhje”, tha Sula, duke shtuar se ajo që ndodhi në 14 maj ishte një sinjal i fortë që na u dha.
Në vijim ai tha se e kuptonte që Tirana mund të humbej në zgjedhje, por nuk arrinte dot të kuptonte se si mund të humbte opozita në bastionet e saj si në Shkodër, Kamëz, Tropojë, Vaun e Dejës e plot bashki të tjera.
“Nëse Berisha, Basha dhe Meta do të luftojnë për të mbijetuar në politikë, le të rrinë dhe të vazhdojnë, por demokratët dhe shqiptarët nuk fitojnë gjë nga kjo mënyrë sjelljeje”, tha Sula.
Ai tha se deputetët gjithashtu duhet të ngrihen përtej agjendës individuale dhe të bëjnë çdo gjë për bashkimin e PD.
Discussion about this post