Mjeku Erion Dasho ka deklaruar ditën e sotme se, sistemi i mjekësisë në vend po degradohet çdo ditë e më shumë duke arritur deri aty sa spitalet iu japin ryshfet mjekëve për të filluar punë. Sipas Dashos, kjo ka ndodhur për shkak se mjekët dhe infermierët më të mirë po largohen nga vendi dhe institucionet shtetërore kanë më shumë pozicione të lira nga sa është numri i mjekëve të rinj.
Përmes këtij postimi në Facebook ai ironizon edhe deklaratat e qeverisë, e cila thotë se krijimi i portalit të punësimit nuk lejon më mjekët që të japin ryshfet për të hyrë në punë. Por, sipas Dashos, tashmë paradoksi është thelluar mjekët marrin ryshfet për t’u punësuar.
“Kush jep sot ryshfet?! Në një debat televiziv para disa ditësh, një përfaqësues i rilindjes përmendi si histori suksesi punësimet në shëndetësi! “I kemi disiplinuar! Kemi krijuar portal dhe nuk paguan kush ryshfet për të hyrë në punë!” ,tha. Po normal! Ka më shumë vende pune se mjekë, pasi mjekët kanë ikur! Në dy konkurset e fundit të specializimeve në Fakultetin e Mjekësisë, ka patur më shumë kuota specializimi se sa kandidatë! Me këto ritme të rilindjes, gjatë mandatit të tretë duhen gjetur mekanizma që të ndalojnë spitalet t’u japin mjekëve dhe infermierëve ryshfet për të filluar punë”, shkruan ai.
Ndërsa paralajmëron se, shqiptarët duhet të bëhen gati për t’u trajtuar tek xherahët, njerëzit e mirë dhe yshtësit, përndryshe duhet t’i hipin avionit ose të paguajnë faturat e kripura në sektorin privat.
