Presidenti i Republikës, Bajram Begaj do të vijojë ditën e sotme konsultimet për datën e zgjedhjeve parlamentare që do të mbahen pranverën e vitit të ardhshëm.
Mësohet se kreu i shtetit do të presë në Presidencë përfaqësuesit e dy partive kryesore, Partisë Demokratike dhe Partisë Socialiste.
Në orën 10:30 është planifikuar që të takohet me përfaqësuesit e PD-së, më konkretisht me sekretarin e Përgjithshëm, Flamur Nokën dhe kreun e grupit parlamentar Gazment Bardhin.
Ky i fundit pak ditë më parë akuzoi se konsultimet janë farsë, pasi sipas tij, Bajram Begaj e ka caktuar datën e zgjedhjeve me kryeministrin Edi Ramën dhe Taulant Ballën.
“Personalisht refuzoj të përfshihem në një proces farsë dhe që synon vetëm t’i japë legjitimitet një akti të diktuar në mënyrë antikushtetuese nga partia në pushtet. Caktimi i datës së zgjedhjeve është kompetencë kushtetuese e Presidentit të Republikës dhe kurrsesi një akt që diktohet nga Edi Rama dhe Taulant Balla. Tashmë dyshja Rama-Balla e kanë caktuar datën e zgjedhjeve dhe Presidenti pritet vetëm të nënshkruajë e të vulosë vullnetin e partisë në pushtet. Farsa e gjoja konsultimeve me parti politike dhe madje edhe me individë pa parti, është një akt i shëmtuar që meriton vetëm të përbuzet”, ka thënë Bardhi në një reagim zyrtar.
Gjithsesi, pavarësisht reagimit publik të selisë blu, se do të refuzojë konsultimet me kreun e shtetit, Begaj nuk e ka anuluar axhendën, për t’i pritur dy përfaqësuesit e PD-së, që i ka dërguar edhe ftesë.
Ndërsa në orën 11:30 është planifikuar që Bajram Begaj të takohet me përfaqësuesit e Partisë Socialiste dhe më pas ngelet për të takuar vetëm Komisionerin Shtetëror të Zgjedhjeve, Ilirjan Calibashin për të përmbyllur konsultimet dhe për të caktuar më pas datën e zgjedhjeve.
Discussion about this post