Egnatia u mund ditën e sotme nga skuadra e Tiranës me rezultatin 0-2 në ndeshjen e vlefshme për javën e 11 të Superligës.
Golat u shënuan nga Ismajlgeci dhe Ngoo, të cilët kështu siguruan për të paktën edhe një javë tjetër kreun e tabelës së kampionatit për ‘Bardhblutë’ e kryeqytetit.
Duke folur pas kësaj disfate trajneri i përkohshëm i ekipit të Rrogozhinës që mori drejtimin pas shkarkimit të Gugash Maganit, Përparim Daiu tregoi se çfarë nuk shkoi mirë në këtë takim.
“Isha shumë i qetë, më mungon fusha e sportit, sepse është ndryshe ta shohësh në tribunë. Cilësitë e Tiranës dihet, por të humbasësh nga gabimet tona, është diçka tjetër. Episodet bëjnë diferencën, zgjedhjet i kisha të limituara. Pengu i vetëm ishte mungesa e rezultatit. Largimi i trajnerit i merr presidenti. Ka qenë probleme jo direkt në ndeshje me Kukësin, por për arsye rezultatesh që presidenti i di më mirë. Kjo është puna e trajnerit, që matet me rezultatet. Të gjithë ato emra që kanë dalë në media, nuk janë kontaktuar. Presidenti ka ende kojë për të bërë zgjedhjet e duhura. Të jem i sinqertë unë nuk kam qenë që të bëja trajnerin te Egnatia, Maganin e kam mik shumë. Gjërat e brendshme presidenti i di më mirë. Kampionati është i gjatë dhe ai ka investuar. Shanset e vetes time nuk i jap unë. Në momentin që ndëshkohesh ke një kundërshtar të fortë, të duhen cilësi që të jesh të barabartë. Ne kemi pasur mungesa nga portieri e deri te sulmuesi Pedro Augusto, janë mungesa që të heqin cilësi.”,– u shpreh ai.
Ndërsa kjo bëhet e katërta javë për ekipin e Egnatias që nuk po munden të marrë një fitore dhe që e ka zbritur në vendin e tetë të tabelës së Superligës me 11 pikë në 11 ndeshje të zhvilluara./K.T/Gijotina.com
Discussion about this post