Elbasani ndalet në barazim pa gola nga Ohri. E para miqësore në tokën maqedonase i ka shërbyer Nevil Dedes për harmonizimin e grupit dhe bërë disa eksperimente me lojtarët.
Në këtë sfidë u provua sulmuesi brazilian Leo Melo dhe mesfushori ekuadorian Zhoao Kuinonez. Sulmuesi italian, Gabriele Paselo, nuk e ka kaluar provën dhe nuk do të vijojë me verdheblutë.
Nevil Dede e nisi lojën me një miksim titullarësh dhe lojtarëve të stolit. Minutat e para janë të qeta, por pak e nga pak Elbasani ambientohet me terrenin dhe nis të marrë në dorë kontrollin e lojës. Mirëpo, mungon forca goditëse në repartin e avancuar, me skuadrën që afrohet pranë zonës, por nuk ka raste të rrezikshme në zonën kundërshtare.
Nga ana tjetër, edhe vendësit shfaqen rrezikshëm në disa raste, por është Totoshi që ndërhyn mrekullisht. E dyta nis me disa ndryshime dhe Elbasani vihet nën kontroll të lojës, duke mos lënë më hapësira mbrapa dhe parë më shumë në sulm.
Luhet një ndeshje e fortë dhe me shumë kartonë të verdhë nga të dyja palët. Verdheblutë shohin t’u mohohet një penallti në të 78-ën pas një ndërhyrjeje nga mbrapa në dëm të Ajazit, me kryesorin që vijon lojën. Mbyllet pa gola kjo miqësore, me verdheblutë që nesër do të luajnë një tjetër ndeshje.
Trajneri në këto momente po i kushton më shumë rëndësi harmonizimit të grupit. Është ky shkaku që nuk shqetësohet nga rezultati. Gjatë deklaratës së dhënë pas ndeshjes për gazetën, Nevil Dede tha: “Minutat e para nuk ishin të mira, sa u përshtat e gjithë skuadra edhe me terrenin.
Më pas, gjithçka ishte nën kontroll. Gjithmonë thuhen ngarkesat fizike dhe dy seancat në ditë të kësaj periudhe, por disa dalje topi që kemi punuar dhe të paktën skuadra në pak raste ishte e hapur. Vuajtëm pak topat e gjatë, koha është e shkurtër dhe harmonizimi i skuadrës është ai që na intereson më shumë.
Besoj se edhe lojtarët po marrin minutat e duhura. Është shumë shpejt për të thënë dhe dhënë një konkluzion. Kemi çdo tri ditë ndeshje dhe besoj se do të krijojnë një ide të saktë”./PanoramaSport
Discussion about this post