Deklaratat e kryeministrit Edi Rama për rritjen e çmimit të karburanteve, gazit dhe jo vetëm, ka shkaktuar pakënaqësitë e para në vend.
Qytetarët shkodranë kanë bërë thirrje për organizimin e një proteste social-ekonomike ditën e martë në orën 11:00 para institucionit të Bashkisë Shkodër.
Kjo deklaratë vjen pak pasi Rama iu drejtua qytetarëve me një mesazh në lidhje me rritjen e çmimit të karburanteve që sipas tij po vjen si pasojë e një krizë të jashtëzakonshme energjetike, ku pritet të ketë rritje të çmimit brenda gjashtë mujorit të parë të vitit të ardhshëm.
Rama tha se kjo fatkeqësi e re ka sjellë një rritje të jashtëzakonshme të çmimeve e jo vetëm të karburanteve, gazit, karbonit e naftës, por edhe mallrave të konsumit që po diktohet nga manovrat tregtare dhe faktorët e tjerë gjeopolitikë.
Çmimi i gazit në tregun tonë është rritur me 30-40 lekë gjatë këtij viti. Nëse gazi deri në fillim të këtij viti ishte deri në 50-60 lekë për litër, sot arrin në 90 lekë. Sakaq, bëhet me dije se në ritme rritëse vazhdojnë nafta edhe benzina. Në 15 korrik në disa pika karburanti 1 litër naftë iu shit shoferëve me 170-175 lekë, nga 155-160 lekë që ishte në vitin e kaluar. Ndërsa tani nafta në shumicën e karburanteve është 177 lekë, kurse benzina arrin deri 180 lekë.
Për Shqipërinë, çmimi mesatar vjetor i blerjes së energjisë nga importi, është thuajse trefishuar në krahasimin me vitin e kaluar.
