Ambasada amerikane ka hedhur poshtë deklaratat e ish-kryeministrit Sali Berisha se ambasadorja Yuri Kim i ka dërguar një person në zyrë për të negociuar lidhur me zgjidhjet për kreun e PD.
Në reagimin e bërë për News24, ambasada përgjigjet duke thënë se shpallja “non-grata” nuk negociohej, duke mohuar kështu aludimet se ambasadorja Yuri Kim kishte bërë një propozim të tillë ndaj ish kryeministrit.
“Pozicioni i SHBA në lidhjet me shpalljet “non grata” për korrupsion madhor mbetet i qartë dhe nuk mund të negociohet”, sqaron ambasada.
Kujtojmë se mbrëmjen e djeshme, ish kryeministri Berisha deklaroi se Yuri Kim kishte dërguar në zyrën e tij një person që i kishte kërkuar të hiqte dorë përkohësisht nga kandidimi për kreun e partisë dhe të vendoste në krye atë person që dëshironte.
Sipas tij, nëse do të respektohej ky kusht, më pas do të mund të kandidonte në krye të partisë. Berisha tha se e kishte refuzuar propozimin e saj, me arsyetimin se ajo nuk mund të ndërhynte në punët e brendshme të PD.
Discussion about this post