Deputetja e Partisë Demokratike, Jorida Tabaku iu është përgjigjur deklaratave të sotme të kryeministrit Edi Rama për ecurinë e Njësisë Speciale Antiinformalitet, nga ku njoftoi se pagat e qytetarëve mund të behën publike një herë në vit.
Përmes një mesazhi në “Facebook”, Tabaku i sugjeron Ramës që të mbështesë të varfrit dhe të forcojë shtresën e mesme. Sipas Tabakut, më shumë taksa nga xhepat e shqiptarëve do të thotë më shumë para për PPP-të që i janë dhënë miqve të Ramës dhe oligarkëve.
“Takso në mënyrë të drejtë, mbështet të varfrit dhe forco shtresën e mesme. Represioni i vazhdueshëm i qeverisë përmes taksave dhe politikave fiskale ka ndikuar në rënien e investimeve, uljen e bizneseve dhe krijimin e një klime të pafavorshme. Njëkohësisht ka nxitur korrupsionin, rritjen e informalitetit dhe ka krijuar një shtet të kapur. Në këto ditë të vështira për ekonominë e gjithsecilit prej nesh, ku çdo portofol i shqiptarëve po kafshohet nga taksa e inflacionit që po i zbraz ato pak të ardhura një qeveri e përgjegjshme do të kishte politika lehtësuese. Do të kërkonte uljen e taksave, për t’i dhënë më shumë para xhepave të shqiptarëve dhe familjeve të tyre. Një qeveri e korruptuar, e kapur nga oligarkia dhe nga megaskandalet është e interesuar për të kundërtën. Nuk është habi që Edi Rama sot ka nisur turin për të taksuar më shumë shqiptarët dhe të ardhurat e tyre të vogla. Më shumë taksa nga xhepi i varfër i shqiptarëve do të thotë më shumë para për PPP-të që i janë dhënë miqve të tij dhe oligarkëve. Ai sot kërcënon me më shumë taksa pasi bixhozi ku është futur me paratë e buxhetit nga taksat e shqiptarëve paguan 90 mijë euro në ditë inceneratorët”, shkruan Tabaku.
Discussion about this post