Juventusi dominoi Chelsean në të gjitha aspektet në sfidën që u luajt në Torino teksa legjenda e bardhezinjve, Alesandro Del Piero komplimentoi trajnerin Allegri për stratgjinë e përdorur dhe kritikoi teknikun Tuhel.
“Ajo që unë mendova në fund të ndeshjes Juventus-Çelsi është se Tomas Tuhel nuk kuptoi asgjë se çfarë ndodhi në Torino. T’u përshtatesh skuadrave italiane është gjithmonë shumë e vështirë, kur ato vendosin që të luajnë në mbrojtje, por akoma më shumë se kaq është se strategjia e përdorur nga Alegri e nxori totalisht jashtë rruge kolegun e tij, duke e fituar jo vetëm në fushë, por edhe në letër takimin.
Pa dyshim që duke marrë parasysh forcën e Çelsit, pritej shumë më shumë nga ata, por edhe në momentin kur Tuhel vendosi që të rrezikonte diçka më tepër, duke kërkuar që të gjente barazimin, të gjitha zëvendësimet u dukën pa sens, pasi asnjë prej lojtarëve që zbriti nga stoli nuk arriti që të gjente vendin e duhur në fushë, jo më të rrezikonte Juven. Bravo Alegri dhe shpresojmë që Juvja të vazhdojë kështu edhe në kampionat”, deklaroi “Pinturikio”.
