Ndonëse deputetët e opozitës i kërkuan të ndalë ofendimet, kryeministri Edi Rama nuk e ka marrë në konsideratë kërkesën e tyre. Nga foltorja e Kuvendit, Rama nuk i ndali fyerjet ndaj opozitës duke bërë lojë fjalësh dhe mohuar se togfjalëshi “kope budallenjsh” është fyerje.
Edhe pse ka thënë disa herë se për mazhorancën ish kryeministri Berisha është “i vdekur” politikisht, Rama akuzoi deputetët se përpiqen që ta kopjojnë dhe prandaj nuk votohen nga demokratët.
“Unë do të vazhdoj të konsumoj kohën e grupit në këtë rast, ne kemi shumë gjëra që na ndajnë, por te gjuha… Ju keni një nivel shumë të ulët, bazik të gjuhës shqipe, më falni për mungesën e modestisë, por ne e kemi pak më ndryshe. Unë nuk i thashë askujt që ti je budalla, unë thashë që ju e keni budallallëkun sëmundje ngjitëse në kopenë tuaj, nëse ju u ndjetë dele, ky është problemi juaj, nuk është problemi im. Dele jeni ju që u ofenduat nga fjala kope” Këto janë mënyra të të shprehurit, nëse do të hyjmë te gjuha parlamentare, ju nuk duhet të hynit kurrë në Kuvend, pasi juve shani dhe shani me fjalë që përbëjnë akuza penale. Për mua nëse dikush më thotë budalla, skam asnjë problem, por nëse dikush më thotë kriminel, hajdut, etj etj. Ti provove që je absolutisht e njëjta gjë, ti the sot se unë paskam çuar ikona në Gjermani, këtë e ka thënë ai, thjeshtë vërtetoni atë që them unë, prandaj ai i vdekuri komplet, u çua dhe ju mori para”, u shpreh Rama.
Sa i takon Parkut të Butrintit, Rama tha se nuk do të ketë asnjë pikë kthese në planin që ai të menaxhohet nga fondacioni shqiptaro amerikan, pavarësisht akuzave të opozitës.
Discussion about this post