Pas takimit me kreun e PD dhe Monika Kryemadhin, delegacioni i ODIHR vijon turin e tij për diskutimet rreth 25 prillit. Ditën e sotme përfaqësuesit e OSBE/ODIHR janë ndalur në zyrat e KQZ, ku kanë zhvilluar një takim me kryetarin Ilirjan Celibashi.
Lajmin e ka bërë të ditur vetë Celibashi përmes një postimi në Facebook, ku shkruan se në fokus të diskutimeve ishin gjetjet e ODIHR në lidhje me zgjedhjet si dhe janë lënë disa rekomandime shtesë që duhen zbatuar në vijim për zgjedhjet e ardhshme.
“Mirëpritëm sot në KQZ Delegacionin e Misionit të Vëzhgimit të OSBE/ODIHR-it të zgjedhjeve të datës 25 prill 2021, të kryesuar nga Ambasadorja Urszula Gacek.
Qëllimi i takimit ishte diskutimi i gjetjeve dhe rekomandimeve të raportit përfundimtar të OSBE-ODIHR për zgjedhjet e 25 prillit, identifikimi i fushave për bashkëpunim të mëtejshëm.
Në emër të Komisionit Qendror të Zgjedhjeve, i shpreha mirënjohjen Ambasadores Gacek për vlerësimet realiste të OSBE/ODIHR për aktivitetin e KQZ-së. Theksova se rekomandimet do të shërbejnë si pika referimi për përmirësimin e mëtejshëm të veprimtarisë së KQZ-së në adresimin e shqetësimeve të ngritura në raport.
Ambasadorja Gacek nga ana e saj vlerësoi se gjetjet e pasqyruara në raport mbi veprimtarinë e KQZ-së, mund të ndihmojnë KQZ-në dhe aktorët e tjerë që të ndërmarrin hapa të tjerë specifike për përmirësimin e proceseve të ardhshme zgjedhore”, thuhet në njoftim.
Kujtojmë se OSBE\ODIHR ka mbikëqyrur gjatë gjithë kos në terren zgjedhjet e 25 prillit në vendin tonë dhe në fund publikoi një raport me rezultatet. Përveç vlerësimit për pjesëmarrjen në zgjedhje, në raport janë evidentuar një sërë shkeljesh nga palët politike.
E.H/ gijotina.com/
