Nesër do të mbahet Kuvendi Kombëtar i PD. Delegatët janë ftuar të votojnë për ndryshimet në statut si dhe Këshillin e ri, por për këtë të fundit lista e kandidatëve mbetet ende mister, pasi selia blu nuk i ka bërë publike zyrtarisht emrat.
Nesër në orën 10:00 Partia Demokratike do të mbajë mbledhjen e Kuvendit Kombëtar.
Dy janë momentet kryesore të Kuvendit: Ndryshime statutore, që kufizojnë rolin e primareve në hartimin e listave të kandidatëve duke shtuar një komision nga partia që bën filtrimin e propozimeve dhe që rrisin kuotat për gratë e diasporën.
Po ashtu, delegatët do të votojnë për të zgjedhur anëtarët e Këshillit të ri Kombëtar.
Por, ndryshe nga tradita e mëhershme kur lista, atribut i kryetarit, publikohej të paktën 48 orë para mbajtjes së Kuvendit, delegatët ende nuk i kanë në dorë emrat e kandidatëve për Këshillin Kombëtar. Ata, me gjasë do t’i mësojnë vetëm në prag të nisjes së punimeve të Kuvendit emrat për të cilët do të duhet të votojnë.
Në axhendën e punimeve është edhe një tjetër pikë: ratifikimi i vendimeve të Këshillit aktual mbi bashkimin në diversitet në 2024, që përmes një dispozite tranzitore futi në strukturat drejtuese deputetët që nuk i ishin bashkuar deri në atë kohë Berishës.
Në Kuvend do të ketë edhe të ftuar ndërkombëtarë të cilët do të mbajnë edhe fjalë, si dhe do të ketë disa video-mesazhe.
Përpara se të miratohen ndryshimet, fjalën e tij do ta mbajë kryetari i sapo-rikonfirmuar Sali Berisha, ndërsa mes folësve do të jenë Grigels Muçollari që do të prezantojë platformën për modernizimin dhe digjitalizimin si dhe Nikola Kedhi, platformën e Diasporës.
Mbledhja e Kuvendit Kombëtar vjen një javë pas zgjedhjeve pa garë, ku Sali Berisha, i cili ishte emri i vetëm në fletën e votimit, u rikonfirmua kryetar për një tjetër mandat me 37 mijë e 341 vota.
gijotina.com/
Discussion about this post