Ylli i Napolit, Osimhen pësoi një dëmtim të rëndë në sfidën ndaj Interit. Futbollisti i bardhekaltërve u detyrua të lërë fushën e lojës për shkak të lëndimit që pësoi në syrin e tij teksa i’u nënshtrua më pas operacionit. Xhianpaolo Tartaro, kirurgu që operoi futbollistin tregon shkallën e dëmtimit teksa sulmuesi do të qëndrojë jashtë fushave të lojës për tre muaj.
“Dëmtimi i tij nuk ishte një frakturë e thjeshtë e pjesës së zigomës, pasi ka përfshirë disa kocka të fytyrës. Nuk ishte një traumë nga përplasja, por nga shtypja, u krijua një dëm shkatërrimtar nga forca kinetike e përplasjes. Për të rindërtuar pjesën e frakturuar më është dashur të vendos 6 pllaka dhe 18 vidha. Është ende herët për të folur për rikuperimin, pasi ndërhyrja ishte e vështirë, gjendja e fytyrës së lojtarit ishte shumë e keqe, por ju garantoj që gjithçka ka përfunduar me sukses.
Kocka ishte thyer në shumë pjesë. Mund të kishte rreth 20 fraktura të ndryshme. Kemi kryer tre orë e gjysmë ndërhyrje. Na është dashur të bëjmë tre prerje në pjesë të ndryshme të fytyrës. Ndaj për fat të keq, 90 ditët që flitet si pushim i detyruar, janë mëse reale. Të shohim se si përgjigjet orbita e syrit dhe nervi. Kaviteti okular është zvogëluar. Syri ka dalë nga orbita, ndaj duhet të kemi shumë kujdes. Si tifoz, do të dëshiroja ta shihja në fushë, por duhet të presim kohën e duhur”, tha kirurgu italian.
Discussion about this post