Denoncimet e Ahmetajt/ Kulla: Ja pse më zhgënjeu për herë të dytë

Ilir Kulla, ekspert i sigurisë, tha se intervista e dhënë mbrëmjen e djeshme nga Arben Ahmetaj e ka vënë SPAK-un në një pozicion qesharak.

Kulla tha se të jesh në kërkim, të të shpallë Interpol në kërkim, dhe të të gjejë gazetari dhe jo institucionet, përfshi edhe SPAK, e kthen këtë institucion në qesharak.

Kulla tha se është zhgënjyer dy herë nga Arben Ahmetaj. “Herën e parë ishte intervista që dha pasi iku si zv.Kryeministër, foli me mllef, me inat dhe e kam thënë që i shkurtoi jetën politike vetes. Hera e dytë është tani”, tha Kulla.

Në emisionin Zonë e Lirë, Kulla tha se Ahmetaj ka qenë pjesë e strukturës së lartë qeverisëse, ishte zv.Kryeministër me peshë, dhe gabimi i tij ishte që foli.

“Ai mund të reagonte me heshtjen e tij, pasi të flasësh ose do i thuash të gjitha dhe të bësh edhe veten përgjegjës, ose nuk do besohesh, nëse sulmon njërën anë”, tha Kulla.

Kulla tha se nëse do të ishte në vendin e Ahmetajt nuk do të fliste, pasi ai nisi që në 1997 karrierën politike dhe vijoi më pas deri në postin e zv.Kryeministrit, duke pasur një peshë të madhe, pasi i ecte fjala.