Organizatorët e protestës që po zhvillohet prej javësh në Tiranë i kanë dërguar një letër ambasadave të vendeve partnere, ku shprehin shqetësime për mënyrën se si Policia e Shtetit ka menaxhuar tubimet e fundit.
Në letrën e tyre, ata pretendojnë se gjatë protestës së 2 korrikut është përdorur forcë joproporcionale ndaj qytetarëve, përfshirë përdorimin e gazit lotsjellës, shtyrje dhe veprime të dhunshme ndaj protestuesve. Sipas tyre, këto veprime kanë cenuar të drejtat kushtetuese dhe standardet demokratike të një shteti ligjor.
Organizatorët i referohen gjithashtu gjetjeve të Komitetit Shqiptar të Helsinkit, i cili ka ngritur shqetësime për mënyrën e administrimit të protestës dhe ka sugjeruar mundësinë e tejkalimit të kompetencave nga ana e policisë.
Në letër kërkohet një hetim i pavarur, transparent dhe efektiv për rastet e dyshuara të dhunës policore, si dhe përgjegjësi për çdo efektiv që mund të ketë shkelur ligjin. Po ashtu, ata kërkojnë lirimin e protestuesve të ndaluar, duke argumentuar se ndalimet dhe masat penale po përdoren si formë frikësimi.
Një tjetër shqetësim i ngritur lidhet me kontrollet e raportuara në pikat kufitare ndaj qytetarëve që udhëtonin për t’iu bashkuar protestës, të cilat organizatorët i konsiderojnë si presion dhe intimidim.
Në përfundim, ata i bëjnë thirrje Policisë së Shtetit të garantojë mbarëvajtjen paqësore të protestave të ardhshme dhe të shmangë çdo veprim që mund të rrisë tensionet, duke theksuar se protestat duhet të mbeten paqësore dhe brenda kornizës demokratike.
Discussion about this post