Denoncimi i Maliqit: Hakerat më kanë vjedhur faqen e Facebook

Kandidati i koalicionit “Bashkë Fitojmë” për Bashkinë Kuçovë, Lefter Maliqi ka bërë një denoncim në lidhje me faqen e tij të Facebook.

Në një reagim për mediat, Maliqi shprehet se për shkak të denoncimeve që ai ka bërë për tenderat korruptivë, abuzimet me taksat e qytetarëve, vjedhjet në bashkinë e Kuçovës, i kanë vjedhur dhe bllokuar faqen e tij të Facebook-ut.

Reagimi:

Skandal!

Paratë e korrupsionit paguan hakerat dhe më kanë vjedhur e bllokuar faqen e Facebook-ut.

Denoncimet e perditëshme ndaj grabitjes së mandatit të Bashkisë Kuçovë, kundër ish-fatorinos, Oligarkut Salillari dhe ‘pengut’ të tij Hajdarit të Kuçovës. Denoncimet për tenderat korruptivë, abuzimet me taksat e qytetarëve, vjedhjet, kallëzimet në “SPAK”, kundër kësaj mafie lokale e qeveritare, bënë që të paguajnë hakerat për të më mbyllur gojën.

Gabojnë pasi nuk ka forcë që më ndal në luftën time, kundër kësaj mafie që po pi gjakun e shqiptarëve, që tjetërsojnë votat, abuzojnë dhe pasurohen me paratë e shqiptarëve.

Ndëshkimi ligjor ndoshta i vonuar, por do të marrin ndëshkimin e merituar! Beteja ligjore, politike dhe mediatike ndaj kësaj mafie nuk do të ndalë.