Deputetja e Partisë Demokratike (PD), Elda Hoti deklaroi sot se qeveria ka braktisur punimet për ndërtimin e rrugës së Lurës, e cila parashikohej të mbyllej në vitin 2023.
“Një projekt i premtuar vite më parë, i promovuar me bujë nga Kryeministri, sot qëndron i bllokuar, i harruar dhe pa asnjë shpresë për realizim”, u shpreh ajo.
Sipas Hotit, fondet që duhej të përdoreshin për ndërtimin e kësaj rruge dhe zhvillimin e zonës, duket se kanë ikur në drejtimin e përhershëm, te investitorët strategjikë të qeverisë ose xhepat e qeveritarëve qendrorë apo vendorë.
“Projekti për rikonstruksionin e rrugës Perlat – Fushë Lurë- Arrëz, me vlerë 12.5 mil euro, zhvilluar nga Fondi shqiptar i Zhvillimit është një kontratë kryekëput korruptive. Punimet kanë filluar që në 2022 dhe kanë mbetur pezull”, theksoi ajo.
Hoti tha se nënkontraktori ka braktisur punimet, ndërsa kontraktori bullgar në faqen zyrtare deklaron se kontrata ERDP/AITP/W/2020/14 e 23 shkurtit 2022, lidhur me FSHZH, ka nisur në mars 2023 dhe do përfundonte në mars 2024.
“Ndërkohë, paratë janë lëvruar, sepse kontraktori vetëm si likuidim TVSH-je ka marrë 7 këste pagesash për këtë kontratë me vlerë 681 mijë euro. Fondi u vodh dhe mirditorët e dibranët mbetën pa rrugë”, u shpreh deputetja Hoti.
Discussion about this post