Drejtuesja e departamentit të Arsimit në Partinë Demokratike, Lili Sula kërkoi sot nga KLSH dhe KQZ të verifikojnë shkeljet e emërimeve politike në arsim.
Ajo deklaroi se, “ministrja e Arsimit, Ogerta Manastirliu, njëkohësisht drejtuese politike e PS e qarkut të Tiranës, po bën masakër me emërimet politike gjatë fushatës elektorale”.
“Ditët e fundit Partia Demokratike ka marrë denoncime lidhur me emërimet në DRAP-et dhe ZVA-të në të gjithë vendin”, tha Suka në një deklaratë për mediet.
“Menjëherë pas riorganizimit të DRAP-ve, Tiranë, Durrës, Lezhë, Fier, Korçë dhe AKAP-it (Agjencia Kombëtare të Arsimit Parauniversitar), këto institucione jetike për arsimin u kthyen në vatra politike personash të paaftë profesionalisht, që emërohen nga kryetarët e bashkive dhe drejtuesit politikë të qarqeve të Partisë Socialiste. Të gjitha këto emërime dhe strukturime bëhen pa transparencë, pa shpallje publike në faqet zyrtare të institucioneve, pa konkurs, pa meritokraci, pa asnjë procedurë rekrutimi, por vetëm me një kërkesë personale me shkrim pranë AKAP-it,” u shpreh ajo.
Sula theksoi se, “Partia Demokratike po ndjek hap pas hapi çdo shkelje të urdhëruar nga Manastirliu dhe të ndërmarrë qorrazi nga vartësit e saj”.
“Partia Demokratike i bën thirrje Kontrollit të Lartë të Shtetit dhe Komisionit Qendror të Zgjedhjeve të verifikojnë të gjitha këto shkelje për të ndaluar masakrën e emërimeve politike në arsim,” u shpreh Sula.
Discussion about this post