Më herët Gijotina.com ka denoncuar se si OSHEE në kohë krizë hap tender në shkelje të ligjit, i cili kap vlerat 10.5 milionë euro. Ndërkohë ditën e sotme zbulohet se një kompani ka denoncuar shkeljet e këtij tenderi në Komisionin e Prokurimeve Publike, në këtë kuadër komision i ka vendosur të pezullohet ky tender. Kompania që ka bërë denoncimin pretendon se disa kritere dhe specifikime teknike kufizojnë konkurrencën dhe nuk sigurojnë trajtimin e barabartë dhe jodiskriminues për të gjithë operatorët ekonomikë pjesëmarrës në procedurat e prokurimit publik.
Po ashtu, në ankesë kompania GSA thekson se si një ofertues i mundshëm për të marrë pjesë në tender ka bërë 4 kërkesa për sqarim në lidhje me paqartësi ne dokumentacionin e tenderit, por nuk ka marrë asnjë përgjigje nga OSHEE. “Ky veprim nuk krijon transparencën e kërkuar nga ligji, duke sjelle konfuzion si dhe diskriminim për ofertueset e mundshem”, thuhet në ankesë. Tenderi i OSHEE Group për instalimin e te sistemit të Matjes Inteligjente në Kabinat Elektrike të OSSH , u hap në fund të muajit mars.
Shpallja e procedurës u pasua nga një sërë akuzash nga deputetët e opozitës në komisionet parlamentare, pasi sipas tyre OSHEE Group nuk ka asnjë tagër të hapë këtë tender, përsa kohë është bërë ndarja e kompanisë. Procedura tenderuese e hapur është me vlerë mbi kufirin e lartë monetar, teksa fondi limit i vënë në dispozicion arrin në rreth 10.5 mln euro, me TVSH. Në dokumentet e tenderit specifikohej se instalimi i Sistemit te Matjes Inteligjente dhe Rrjetave Inteligjente, përfshijnë platformën e vendosjes se matëseve inteligjentë në konsumatorët fundore, platformën e vendosjes se matesave bilanciere ne kabinat elektrike si dhe platformën e verifikimit dhe kontrollit te tyre. Sipas OSHEE instalimi i tyre do të ndikojë në reduktimin e vjedhjeve të energjisë elektrike, uljen e humbjeve teknike dhe uljen e kostove të mirëmbajtjes. Këta matës mundësojnë lexim automatik, çka do të thotë se lexuesit e matësve do të duhet të largohen nga puna.
Discussion about this post