Deputetët pjesëmarrës në Këshillin e Mandateve, do të lejohen të marrin USB-në me materialet hetimore të SPAK për Belinda Ballukun. Sipas raportimeve palët janë dakordësuar që deputetët ta marrin USB-në me vete.
Fillimisht kreu i grupit parlamentar të Partisë Socialiste, Taulant Balla, deklaroi se dokumentacioni nuk duhet të dalë nga mbledhja e Këshillit të Mandateve, duke u kërkuar demokratëve që provat (USB) ta shohin në mbledhje dhe të mos i marrin me vete.
Por me sa duket palët kanë gjetur dakordësinë për të marrë USB-në.
Burime bëjnë me dije se prokurorët kanë sqaruar se materiali i USB-së mund të aksesohet vetëm nga anëtarët e Këshillit të Mandateve, duke respektuar procedurat ligjore, ndërkohë që Prokuroria ka dhënë gjithashtu dakordësinë që edhe avokati i Ballukut të njihet me provat.
Ky i fundit ka kërkuar të shtyhet me 3 javë mbledhja e Këshillit të Mandateve për tu njohur më të gjitha aktet e SPAK. Por kjo kërkesë është kundërshtuar nga prokurorët e SPAK, të cilët kanë thënë se maksimumi mund të marrë 5 ditë kohë për tu njohur me aktet.
Ndërkohë, sipas raportimeve, deputetët demokratë kanë kërkuar që mbledhja e ardhshme të mbahet në 22 dhjetor, ndërsa socialistët kanë kërkuar që kjo mbledhje të shtyhet për në muajin janar.
Ende nuk ka një vendim për datën se kur mund të zhvillohet mbledhja e ardhshme e Këshillit të Mandateve dhe Imunitetit.
Discussion about this post