Brenda këtij muaji pritet të hyjë në fuqi aplikimi i tarifave në Tunelin e Llogarasë, duke i dhënë fund periudhës së kalimit pa pagesë për drejtuesit e mjeteve.
Punimet për instalimin e sistemit të pagesës janë drejt përfundimit, ndërsa gjatë ditës së sotme janë kryer testimet finale për të siguruar funksionimin e plotë të tij. Kamerat e sigurisë, sistemet elektronike të kontrollit dhe e gjithë infrastruktura mbështetëse po kalojnë në verifikimet e fundit, në mënyrë që procesi i tarifimit të nisë pa probleme.
Sipas skemës së parashikuar, tarifat do të variojnë nga 100 lekë për motoçikletat deri në 5000 lekë për mjetet e tonazhit të rëndë. Për autoveturat, pagesa do të jetë 250 lekë për një kalim, ose 500 lekë vajtje-ardhje. Ndërkohë, 500 lekë do të paguajnë mjetet me karroceri, ndërsa për furgonët dhe autobusët tarifa do të arrijë në 1000 lekë.
Vendosja e këtyre tarifave pritet të shoqërohet me reagime nga qytetarët dhe udhëtarët, të cilët deri më tani e kanë shfrytëzuar tunelin pa pagesë. Mbetet ende e paqartë nëse do të aplikohen lehtësi apo tarifa të reduktuara për banorët rezidentë të zonës.
Tuneli i Llogarasë konsiderohet një investim i rëndësishëm për përmirësimin e qarkullimit drejt jugut të vendit, duke shkurtuar ndjeshëm kohën e udhëtimit por brenda pak muajsh nga ndërtimi ka shfaqur defekte serioze në infrastrukturë.
Për shkeljet me tenderin e ndërtimit të Tuneli i Llogarasë, SPAK ka marrë të pandehur ish-zv.kryeministren Belinda Balluku, bashkë me ish-kreun e ARRSH, Gentian Gjyli, si dhe Erald Elezi, ish-drejtor i Drejtorisë së Planifikimit Strategjik dhe Operacioneve. Të tre akuzohen për shkelje të barazisë në tenderin me vlerë 190 milionë euro.
Discussion about this post