Deputeti i Partisë Demokratike i zgjedhur në qarkun e Kukësit, Flamur Hoxha, ka reaguar pas takimit të Sali Berishës në këtë qytet në kuadër të “Foltores”.
Në statusin e tij në facebook, Hoxha duke u shprehur mirënjohje qytetarëve kuksian që e kanë zgjedhur si deputet i PD dhe se prezenca e tij në këtë forcë politike nuk është rastësi.
“Uroj që këtë status secili ta lexoje larg emocioneve e sa më afër realitetit objektiv të PD prej 30 vitesh. Asokohe isha 23 vjeçar kur u bëra anëtarë nismëtar i saj, i PDSH. Unë jam votuar nga mijëra qytetarë e demokrate kuksiane që të jem deputet i PD. Ndjehem krenar dhe jam mirënjohës thellësisht votuesve të mi e të PD. Unë jam një individ në oqeanin PD, kontribues i përjetshëm pa kushte dhe gjithnjë pranë në kohërat e vështira te saj. Njerëzit që më kanë njohur e dinë se nuk jam rastësisht në anijen PD, nuk jam rastësisht antikomunist të cilën e kam të shkruar në lëkurë me plumba” – shkruan Hoxha.
Hoxha u ka kthyer përgjigje zërave spontan, siç i quan ai, që thërrasin për të dal Partia Demokratike. Ai shprehet se këtë gjë as nuk e ka menduar, pasi në PD nuk ka hyrë për hatër të askujt as për mëshirë të ndokujt, por për hir të familjes e historisë time
“Edukata, pjekuria e formimi im më kanë diktuar gjithmonë të jem institucional. Prandaj jam e do të jem pjesë e institucionit të madh PD, pjesë e forumeve zyrtare të zgjedhura me votat e demokratëve, pjesë e grupit parlamentar të PD. I mirëkuptoj zërat spontane që thërrasin të dalim nga institucionet por nuk e kam menduar kurrë të dal nga institucioni i shenjtë PD. Jeta ime si dhe fjala është e shenjtë edhe në misionin fisnik për të kontribuar politikisht në PD ku gjendem natyrshëm. Unë nuk jam në PD për hatër të askujt as për mëshirë të ndokujt, jam në PD për hir të familjes e historisë time.
Miq demokrate, jemi shumë e më shumë të bashkuar, jemi pak për të qenë të ndarë e të përçarë, garojmë në kontribute për PD dhe jo në përfitime prej saj” – shkruan deputeti Hoxha në facebook.
Kujtojmë që Flamur Hoxha është dhe drejtues politik i Partisë Demokratike në qarkun e Kukësit.
