gron Gjekmarkaj, nënkryetar i PD-së, në rubrikën “Opinion’ në News24, tha se kërkesa e opozitës për Qeveri teknike është e drejtë.
Gjekmarkaj tha se Qeveria teknike do të relaksojë shoqërinë, mediat, por njëherazi do të kujdeset për një proces zgjedhor që të garantohet vota e shqiptarëve.
“Ajo në 2017 me Edi Ramën Kryeministër nuk është qeveri teknike, ishte një kurth kur lideri i opozitës me apo pa dëshirë ra në kurth, dhe zgjedhjet patën shumë manipulime”, tha Gjekmarkaj.
Sipas tij, qeveritë teknike në prag të zgjedhjeve mund të jenë si ajo në Maqedoninë e Veriut apo Greqi.
Gjekmarkaj tha se në këtë protestë ishin qytetarët që morën në dorë opozitën pranë institucioneve dhe kudo që ata deshën të shkonin.
Nënkryetari demokrat tha se “nuk kemi asgjë me flamurin, vulën apo logon e PS-së, nuk kemi ndërhyrë asnjëherë që ti tjetërsohen ato, por me gjasë shqiptarët kanë menduar se kjo parti nuk është ajo e profesorëve dhe e atyre që e reformuan këtë parti, është shndërruar në një parti që është e lidhur tashmë me errësirën dhe me gjasë qytetarët tentuan që përmes molotovëve ta bëjnë dritë, qoftë edhe për 1 natë”.
Gjekmarkaj tha se opozita kishte paralajmëruar një protestë pa fjalime, çka sipas tij, do të thotë se ajo do ishte protesta e qytetarëve.
“Edi Rama do na ketë përballë në Parlament, në sheshe, në rrugë, kudo në Shqipëri. Njerëzit shprehën revoltën e tyre me mosbindje civile”, tha Gjekmarkaj.
Gjekmarkaj tha se opozita do të vijojë aksionin e saj në Kuvend, por rikonfirmoi se deputetët demokratë nuk kanë ndërmend të bojkotojnë atë që e cilësoi si hapësirë demokratike.
Gjekmarkaj tha se mazhoranca ka marrë peng rregulloren e Kuvendit dhe po përjashton pa asnjë bazë deputetët e opozitës, pasi ky është modeli që kjo mazhorancë kërkon, të mos ketë opozitë përballë.
“Ne nuk jemi qenie mitologjike, jemi njerëz mëse të zakonshëm, por jemi të vendosur të qëndrojmë dhe t’i shkojmë deri në fund aksionit tonë opozitar.
Discussion about this post