Deputetja Marjana Koçeku ka reaguar përmes një postimi në rrjetet sociale, duke deklaruar se prej disa ditësh është bërë objekt i një fushate sulmesh nga profile të rreme dhe patronazhistë, të cilët, sipas saj, i kërkojnë të heqë dorë nga mandati i deputetes.
Koçeku e lidh këtë situatë me vendimin e saj për t’u larguar nga Partia Socialiste dhe për të mbështetur protestën e opozitës, duke pretenduar se pas sulmeve qëndrojnë funksionarë të shtetit.
“Prej disa ditësh po përballem në rrjetet sociale me një ushtri virtuale patronazhistësh e profilesh të rreme që më kërkojnë me e lanë mandatin. Me e lanë mandatin e kam shumë të lehtë, por nuk jam mësue me i hapë rrugë të keqes”, shkruan deputetja.
Ajo pretendon se profilet e rreme janë të organizuara për të sulmuar dhe denigruar zërat kritikë ndaj qeverisë.
Sipas Koçekut, në rrjetet sociale qarkullojnë qindra mijëra profile të tilla, ndërsa akuzon bashkitë se janë shndërruar në qendra koordinimi për këto fushata.
Deputetja shprehet se ka qenë e vetëdijshme për pasojat e qëndrimeve të saj politike, por thekson se nuk do të tërhiqet.
“E kam ditur se çmimi i të folurit lirshëm do të ishte i lartë, por heshtja do të kushtonte shumë më tepër në këtë republikë që kërkon t’i luftojë qytetarët e vet me fantazma, hije patronazhistësh dhe profile false. Kjo nuk duhet të jetë republika e fallsitetit dhe e fantazmave online”, përfundon Koçeku në reagimin e saj.
Discussion about this post