Komisioni Qendror i Zgjedhjeve ka gjobitur me 5 mijë lekë drejtorin e shkollës së mesme “Shën Meri” në Kukës.
Pas denoncimit të organizatës “Qëndresa Qytetare”, kreu i KQZ, Ilirjan Celibashi në mbledhjen e sotme, vendosi dënimin me gjobë të drejtorit, pasi lejoi aktivitetin politik brenda oborrit të shkollës të Gerta Durakut, kandidate në zgjedhjet e 25 prillit nën siglën e PS.
Ilirjan Celibashi u shpreh se vetë drejtori i shkollës e pranoi se aktiviteti partiak ishte zhvilluar brenda oborrit të institucionit arsimor që ai drejton, ndërsa nuk dihet reagimi i tij pas marrjes së gjobës.
