Këtë të premte në orën 19:45 do të luhet derbi i parë i sezonit 2021-2022, ai midis Dinamos dhe Partizanit.
Në prag të kësaj sfide portieri i ‘Të kuqve’ të kryeqytetit, Alban Hoxha ka vlerësuar maksimalisht kundërshtarët, teksa ka shtuar se nga ky takim kërkohet vetëm një gjë, 3 pikët.
“Kemi luajtur mirë në 3 ndeshje, jemi penalizuar nga gabimet individuale. Duhet të kemi kujdes në mbrojtje, të mos gabojmë si më përpara. Loja do jetë e njëjtë, thjeshtë të minimizojmë gabimet. Më vjen mirë që është rikthyer Dinamo. Këto ekipe duhet të jenë në elitë. Kam kaluar 6 vite të bukura atje. Isha edhe kur dolëm kampion me profesorin. Është ndjesi e bukur, po presim. E kemi përgatitur ndeshjen dhe shpresojmë të marrim 3 pikët e para.”- u shpreh ai.
Më tej kapiteni i ‘Demave të kuq’ ka thënë se pavarësisht që nuk dëshiron ‘ja shkaktojnë ata humbjen e parë ‘Nëndetëses blu’, pikët janë më të rëndësishme për të.
“Edhe Dinamo do humbë, si të gjithë. Nuk kemi dëshirën më të madhe t’u shkaktojmë humbjen e parë, por të marrim fitoren vetë. Objektivi është të jemi sa më afër kreut. Dinamo është ekip i fortë, mbron mirë si ekip dhe ka sulm të rrezikshëm. Duke i parë këto, duhet të jemi të kujdesshëm prapa. Pastaj t’ia lëmë fushës, pasi varet si merret ndeshja”.-vijoi Hoxha.
Duke folur për titullin e këtij sezoni gardiani ka theksuar se mundësitë për të dalë kampionë janë të gjitha.
“Kemi lojtarë të talentuar dhe një grup të mirë. I kemi mundësitë edhe për të dalë kampionë, por kjo bëhet me punë dhe sakrificë. Kampionati është i gjatë dhe nëse jemi në një mendje e duam të punojmë, mund t’ia dalim pasi i kemi të gjitha mundësitë”- tha ndër të tjera portieri i Partizanit.
Ndërsa theksojmë se tre javët e para nuk kanë qenë aspak pozitive për ta pasi kanë marrë vetëm dy barazime dhe një humbje./K.T/Gijotina.com
