Pas lajmit se Gjermania kërkon kthimin e vizave për Shqipërinë, Partia Demokratike ka publikuar shifrat e fundit që tregojnë numrin e azilkërkuesve shqiptarë në Europë.
Deputetja Jorida Tabaku shkruan në Facebook se tashmë janë mbi 200 mijë shqiptarë që në 8 vitet e fundit kanë aplikuar për azil në kontinent dhe kanë braktisur atdheun. Sipas deputetes, këto shifra rrezikojnë një nga pikat kryesore për çeljen e negociatave.
Kemi numrin më të lartë të azilkërkuesve në Europë duke rrezikuar edhe një nga pikat e vendosura nga BE për çeljen e negociatave. Kriteret e vendosura janë një letër lakmuesi për të kuptuar se sa seriozisht e ka qeveria jonë procesin e integrimit. Por sot numërohen mbi 200 mijë shqiptarë që kanë ikur nga vendi në 8 vjet. Nuk shohin të ardhmen këtu, nuk besojnë më tek një qeveri që punon për veten dhe varfëron shqiptarët. Ka ardhur koha të ndryshojmë realitetin”, tha Tabaku.
Ndër të tjera, Tabaku shprehet se ka ardhur koha që politika të punojë për qytetarët dhe integrimi të jetë kryefjala e përpjekjes së qeverisë.
