Vesh fanellën e skuadrës tënde, merr frymë thellë dhe nisesh drejt stadiumit. Gjithnjë me një mendim në kokë: të fitojmë derbin. Kjo është ndjesia e çdo tifozi të Tiranës dhe të Partizanit sot dhe përgjithmonë kur ata ndeshen mes tyre. Por ky nuk është një derbi “i zakonshëm”, edhe pse e tillë kjo ndeshje nuk është kurrë…
Ky është një derbi që vlen titullin. Prej dekadash nuk kishte ndodhur që në këtë fazë të kampionatit kjo ndeshje të ishte vendimtare për titullin kampion. Ndaj dëshira për ta fituar atë tanimë është ëndërr, është fiksim, është shpresa e madhe për hapin e madh drejt objektivit kryesor.
Prandaj sot është një ditë speciale, një ndeshje speciale. Dhe jo vetëm për lojtarët që zbresin në fushë, apo për tifozët në tribuna. Është një ndeshje “jetike” edhe për klubet.
Një ndeshje që mund të vendosë titullin dhe rrjedhimisht se kush shkon në Champions. Aty ama llogaritë bëhen me 1 milion euro. Po, sepse titulli kampion dhe pjesëmarrja në Champions sjellin minimalisht 1 milion euro në arkat e kampionëve të ardhshëm të Shqipërisë.
Prandaj ky derbi nuk është vetëm një ndeshje futbolli, një ndeshje titulli, është një derbi që vlen1 milion euro dhe që ndikon direkt edhe në politikat e klubit për vitin e ardhshëm./PanoramaSport
Discussion about this post