Olympiakos – AEK, derbi i derbeve, një nga sfidat më të nxehta në Ballkan, është kthyer në një arenë dhune në Pire të Greqisë, aty ku huliganët e skuadrës bardhekuqe kanë pushtuar fushën për shkak të vendimeve të gjyqtarit.
Ndeshja ishte me rezultatin 1-1, kur arbitri akordoi një penallti në favor të skuadrës së AEK-ut. Kjo ka nxitur reagimin ekstrem me tifozët që nuk e kanë pranuar vendimin dhe për rreth 13 minuta, ndeshja u ndërpre për shkak të trazirave dhe objekteve të hedhura në fushë. Megjithatë, takimi rifilloi dhe në minutën e fundit, miqtë kanë shënuar edhe golin e tretë.
Duke i paraprirë një sulmi tjetër, arbitri i ka dhënë fund ndeshjes por kjo ka tërbuar edhe më shumë tifozët të cilët kanë hyrë në fushë duke u munduar të sulmojnë futbollistët.
Në fushë për të kundërshtuar vendimet e arbitrit ka zbritur edhe vetë presidenti i Olympiakos, Vangelis Marinakis.
Për fat të mirë, futbollistët kanë arritur të hyjnë në dhomat e zhveshjes dhe pas ndërhyrjes së policisë, asnjë nga tifozët nuk ka arritur të hyjë në dhomë.
Fitorja e AEK-ut e mban në vendin e parë me barazim pikësh me Panathinaikosin, ndërkohë që Olympiakos renditet në vendin e tretë me 9 pikë më pak se dy kryesueset.
Discussion about this post