Këtë të premte do të luhet derbi i parë i kryeqytetit për sezonin 2021-2022, ku Dinamo do të presë në ‘Elbasan Arena’ në orën 19:45 skuadrën e Partizanit.
Në prag të këtij takimi trajneri i ‘Të kuqve’, Ilir Daja ka theksuar se ai është i vetëm që ka qenë në krye të stolave të të treja ekipeve të kryeqytetit.
“Mendoj që rikthimi i Dinamos është një vlerë e shtuar, pasi është një nga ekipet me më shumë tituj. Kam dhënë maksimumin kur isha me ta dhe doja çdo fitore, të njëjtën gjë bëj edhe me Partizanin. Po flas edhe për veten pak, jam trajneri i vetëm në historinë e futbollit shqiptar që i kam drejtuar të tria skuadrat e kryeqytetit. Nëse nuk do ishin këto faktorë, sigurisht nuk do isha këtu ku jam. Kam drejtuar edhe klube shumë të rëndësishme dhe kundërshtarët i kam respektuar maksimalisht, por bëj maksimumin që t’i mund.”- tha ai.
Më tej Daja shtoi se të gjitha ndeshjet kanë të njëjtat emocione për ta, teksa theksoi se fitorja është qëllimi i parë, por nuk mohoi se mund të ndodhi dhe e kundërta.
“Ne përjetojmë ndeshjet me të njëjtat emocione. Marrëveshja jonë është për objektiva maksimale. Derbi ka një dozë të shtuar emocionale. Tentohet gjithmonë fitorja e derbit, por janë të tria rezultatet. Tentojmë të përdorim disa module, duke u përshtatur me lojtarët që kemi dhe mungesat që në këtë periudhë që po kalojmë janë të shumta. Nuk është skema ajo që sjell rezultat, por manovra që duhet të jetë e automatizuar. Duhet të jemi fleksibël për çdo situatë”,-shtoi Ilir Daja.
Ndërkohë rikujtojmë se deri më tani ecuria në kampionat e Dinamos është më e mirë se e Partizanit, pasi nuk numëron asnjë humbje./K.T/Gijotina.com
