Ditën e sotme do të zhvillohen një pjesë e takimeve për javën e 11 të Seria A dhe ndër sfidat më interesante për tifozët shqiptarë është ajo midis Salernitanës dhe Napolit.
Në të dyja këto skuadra aktivizohen lojtarë të Kombëtares shqiptare dhe asaj të Kosovës, pra duke bërë që në orën 18:00 në Seria A të kemi derbi shqiptarësh. Mbrojtësi i përfaqësuese ‘Kuqezi’ Frederik Veseli ka kaluar Covid-19 dhe do të jetë në gjendje që t’i bashkohet ekipit të Salernitanës pas disa javësh mungesë, megjithatë nuk dihet nëse do i besohen minuta loje.
Teksa te Napoli është titullar i padiskutueshëm qendërmbrojtësi i përfaqësueses së Kosovës Amir Rrahmani. Rrahmani prej javësh tashmë e ka treguar se është lojtar vendimtar te klubi italian dhe po ashtu ditën e sotme pritet që ta nisë ndeshjen që nga minuta e parë e saj.
Aktualisht Salernitana është duke vuajtur mungesën e fitoreve, teksa renditet në vendin e 19 me vetëm 7 pikë, me Napolin nga ana tjetër që është duke kaluar një sezon shumë pozitiv dhe mban kreun e tabelës me 28 pikë.
Një tjetër ndeshje interesante e Seria A për sot është ajo midis Sassuolos dhe Empolit që do të zhvillohet në orën 15:00, ku pritet të marrin pjesë tre shqiptarë të tjerë. Në takimin e fundit të tyre, atë kundër Interit, Nedim Bajrami që përfaqëson ngjyrat e Kombëtares ‘Kuqezi’ dhe Ardian Ismajli, që është pjesë ‘Dardanëve’ e nisën sfidën që nga minuta e parë të saj duke qenë pjesë e formacionit startues.
Teksa talentit 19-vjeçar, Kristjan Asllani iu besuan minuta nga pjesa e dytë e takimit dhe ndonëse nuk ishte në formën më të mirë të tij, bëri lojë të bukur.
Ora 20:45 rezervon një prej ndeshjeve me të veçanta të Seria A për këtë raund. Roma do të presë Milanin në një takim nga i cili pritet të shikohet shumë. ‘Kuqezinjtë’ e Italisë janë duke kaluar një periudhë shumë të mirë dhe renditen të dytët e Seria A me pikë të barabarta me Napolin e vendit të parë, teksa Roma qëndron në vendin e katër me 19 pikë, 9 më pak se kundërshtarët e këtij takimi.
Teksa ende nuk dihet nëse trajneri Jose Mourinho do e ketë pjesë të grumbullimit mbrojtësin e Shqipërisë, Marash Kumbullën, pasi tekniku e ka deklaruar hapur tashmë antipatinë që ka për të.
Megjithatë në takimin e fundit atë kundër Cagliarit që u fitua në transfertë nga ‘Verdhekuqtë’ me rezultatin 1-2, portugezi e aktivizoi shqiptarin në minutat shtesë, një shenjë ‘paqeje’ kjo ndoshta, gjë e cila do të shikohet në vijim./K.T/Gijotina.com
